أثناء القصف

موقف حصل أثناء العدوان اليهودي على غزة :
واحد صاحبي ربنا يكرمه يا رب و يوفقه قال لي أنه عايز يقول كلمة ف مسجد عندنا بعد الصلاة عن غزة و واجبنا ناحيتهم .. ربنا يكرمه قال لي تعالى ف الصلاة الفلانية قبل الصلاة بشوية . عرفت بعد كده أنه كان ناوي نجمع تبرعات لغزة . لكني كعادتي السيئة ذهبت متأخرا و دخلت في وسط الصلاة . بعدما سلم الإمام طلع أخونا الله يكرمه استأذن من الإمام قال له " ممكن أقول كلمة " ، قال له " اتفضل " . بدأ أخونا و قال" بسم الله والحمد لله و الصلاة و السلام على رسول الله . طبعا كلنا شايفين اللي بيحصل ف غزة اليهود بيقصفوهم قصف متواصل و بالتواطؤ مع مصر للأسف ........ " لا أدري أكانت هذه الجملة الأخيرة في محلها أم لا . أنا متأكد أنها صحيحة لكني لا أدري أكان هذا وقته أو هذا ما حضر أهله . لكن المهم ما إن قالها أخونا كنت أنا لسه بأجيب الركعات المتأخرة عليا سمعت صوتا خارجا من أحد المصلين " لاااااا مصر طول عمرها أم العرب " قلنا ف نفسنا صباح الفل . أدينا بدأنا . طبعا صاحبنا سكت لغاية لما الناس كملت كلامها و تعالت الأصوات و الإمام الله يسامحه قال له " عايز تتكلم يبقى تتكلم في حاجه م الصميم الدين " أليست غزة من صميم الدين ! حاجه تزعل و الله . كمل الإمام كلامه " أنتم شباب متحمسين احنا عاشرنا حرب ( على ما أذكر ) 68 . كان الفلسطينيين بيسلمونا لليهود " و كل ما ييجي حد يتكلم عن موضوع غزة يقول الكلمتين دول " كان الفلسطينيين هما اللي بيسلمونا لليهود " كل المسجد بقى محلل سياسي و بيتكلم و فيه واحد رمى كلمة على حسن نصر الله لما كان بيدعوا المصريين إلى نزول الشوارع للضغط على الحكومة . متفهمش ايه اللي دخل حسن نصر الله ف الموضوع . الموضوع كان عن غزة ايه اللي دخل حسن نصر الله ف الموضوع . بعد ما الكلام هدأ بدأ أخونا يكمل كلمته . الحمد لله كان واثق من نفسه و اتكلم عن واجبنا و اتكلم عن المقاطعة . كانت كلمة موجهة و جميلة ما شاء الله . بعد ما خلص كلمته ناداه واحد من الحضور و طبطب ع الأرض إشارة إلى أنه يقعد جنبه . الراجل ده هو اللي قال " لااااااا مصر طول عمرها أم العرب " المهم قعد يكلمه شويه و الناس برضه بتتكلم . بأقولكم كله كان بيتكلم . أنا بقى واقف مش عارف أدخل ف الحوار . أنا دمي بيفور بسرعة . بأتنرفز بسرعة . المهم قمت رميت كلمة للراجل ده قلت له . " دلوقتي الناس عماله تتضرب . ليه المعبر مش مفتوح ؟ " رد عليا بإجابة غريبة جدا " قال لي المعبر مفتوح " . مفتوح ! مفتوح ازاي ! أمال الناس اللي طالعه مظاهرات دي و قارفه نفسها و شغالة " أول مطلب للجماهير .. فتح المعبر طرد سفير " الناس دي مش واخده بالها و طالعه تزعق و خلاص ؟ يمكن قصده أن المعبر مفتوح لعبورالمرضى . يبقى فهم غلط . هرد عليه بقول الشاعر ف مظاهرة تانية بقى . مش عارف ايه حكاية المظاهرات معايا مع إنهم بيقولوا إن الخروج في مظاهرات لنصرة غزة يعتبر إلهاء عن ذكر الله . المهم الشاعر كان بيقول " فتح المعبر للأحياء .. مش للمرضى و للأشلاء " الحوار انتهى و الناس مشيت و بعدها اكتشفنا أن الراجل ده ف الجيش كان ع الحدود مع رفح يعني دماغة متعبية عناكب . المهم بعد ما خرجنا من المسجد كنت قرفان جدا من كلام الناس . الناس بتتضرب بالصواريخ و حتى الإمام اللي بأقولكم عليه ده لما جاله واحد بعد صلاة الفجر ف أول يوم للقصف . بيقول له أنت ليه مدعتش لغزة ؟ قام قاله الكلمتين نفسهم بتاعته " دول كانوا بيسلمونا لليهود " . الراجل قاله " دي مش قضية فلسطينيين و مصريين . دي قضية المسجد الأقصى " قال الإمام " و فيه ناس كمان بتقولنا ممنوع تدعي ع اليهود و الأمريكان " طبعا يقصد الأمن . أيوه الأمن بيقعد مع أئمة المساجد يقول لهم كده. من ساعتها و الله الإمام ده وقع من عيني بعد ما كنت باحترمه . و أكمل الإمام كلامه : " طب ما أنا لو دعيت و اتمسكت يبقى أنا كده حرمت الناس من دعوتي . الداعية الفطن ميعملش كده " محسسني أنه حامل الدعوة ف الحي عندنا . يا راجل بلا كلام فاضي بلا بتاع . اتضايقت منه و الله . الراجل قاله باللفظ " مين أبو شخة ده اللي بيقولك متدعيش " معذرة ف اللفظ بس هما كده فعلا . آه و الله هما كده . موقف حصل مش عارف رأيكو فيه ايه . بس ع العموم أخونا خد الثواب و برأ ذمته قدام ربنا سبحانه و تعالى . و هما بقى يشوفوا هيقولوا ايه لربنا . خلي أبو شخة ينفعهم . معلش ف اللفظ تاني أصله عاجبني أوي :D