لم تكن موجودة

باسمك ربي مسكت قلمي وبك أرفعه . الطبيعي أننا نبدأ من البداية وننتهي عند النهاية . البداية كانت عندما فوجئنا بأن حركة المقاومة الإسلامية حماس دخلت قطاع غزة عنوة و حدث التحام مع قوات فتح و العالم يشاهد و لا يستطبع إغلاق فمه من هول ما يراه . فهو يرى أن بدلا من أن يضرب المسلمين عدوهم الصهيوني . كانوا يضربون رقاب بعض . حماس تضرب في فتح و فتح تضرب في حماس . بعد ذلك علمت أنه كانت هناك خطة ثلاثية بين فتح و مصر و اليهود للقضاء على حماس . عندها اتخذت حماس قرارها بدخول قطاع غزة بالسلاح و لو تكلف ذلك الالتحام مع قوات فتح لأنهم هم البادئين برأيهم . بعد ذلك استولت حماس على قطاع غزة بالكامل و لم يعد فيه أي يهودي أو فتحاوي . غزة حينها فقط أصبحت طاهرة حسيا و معنويا . بدأت بعدها المؤامرة الكبيرة من التضييق على القطاع و عدم السماح بدخول الوقود و المواد الغذائية . مات المرضى في المستشفيات إثر انقطاع الكهرباء . و كلنا سمعنا و قرأنا تلك الجملة " غزة تعيش في ظلام دامس " حينها بدأ الحصار المصري القذر بعدم السماح بفتح معبر رفح لعبور المواد الغذائية و المرضى إلا في بضع حالات يقمن صلبه . كان الحصار الخانق يذكرنا بمقاطعة و حصار قريش للرسول - صلى الله عليه و سلم - في (شِعب أبي طالب) حينها كان الصحابة يأكلون ورق الشجر . يبدو أن التاريخ يعيد نفسه كما يقولون . بعد ذلك حدث كسر معبر رفح بالقوة من الجانب الفلسطيني وتدفق مئات الفلسطينيين إلى الأراضي المصرية و اشتروا البضائع الازمة من مأكل و مشرب و غيره . المهزلة أننا لم نكرمهم و نراعي ظروف فقرهم و حصارهم بل قمنا ببيع البضائع بأسعار أعلى من سعرها الطبيعي و استغلينا احتياجهم الشديد لتلك المواد الغذائية لكن مش مشكلة على الأقل حصلوا على حاجتهم . بعدها قامت السلطات المصرية بإغلاق المعبر مرة أخرى . استمر الحصار طويلا .. طويلا .. أكثر من عام . إلى أن حدث ما خطط له العدو الصهيوني . قصف جوي شنيع لقطاع غزة . قتلى بالجملة . أصوات من تحت الأنقاض . آهات من تحت الرماد . مجزرة من قبل الجانب الصهيوني و مسخرة من الجانب المصري . ما يقرب من 250 شهيد . الجرحى يملئون المستشفيات . دوي سيارات الإسعاف لا يتوقف . و مع ذلك المعبر لم يفتح . بالمناسبة نسيت أقولكم أن معبر رفح لا توجد سيطرة يهودية عليه . معبر رفح بين غزة و مصر فقط لا غير . يعني مصر تفتحه وقت ما هيا عايزة و تقفله وقت ما هيا عايزة . لكن نعمل ايه بقى . خيانة و عمولة و تكلم كما تريد أن تتكلم فلا حرج . الغريب في الأمر أن يخرج مسؤول يقول لنا أن صواريخ حماس على المستوطنات اليهودية هو السبب في هذا القصف . و يحملون حماس المسؤولية و لكن الغريب في الأمر أن القصف الصهيوني كان موجودا في حرب 48 و لكن حماس لم تكن موجودة . حماس لم تكن موجودة أيام وعد بلفور . حماس لم تكن موجودة عندما دخل اليهود فلسطين . حماس لم تكن موجودة حينما قصفت أول طائرة صهيونية أرض فلسطين . حماس لم تكن موجودة قبل ذلك . فهل هي السبب . القصف كان موجودا حينما كانت حماس غير موجودة . و لكنها الآن موجودة ........ و بقوة

ما أسهل المظاهر

بأحس أن الشعب المصري في الفترة الحالية شعب مظاهر من الطراز الأول . عندك مثلا ممكن تلاقي الراجل راكب ميكروباص و كاتب عليه "هذا من فضل ربي" ومشغل أغاني وممكن لو اتشاكل مع واحد م الزباين يسب له بالدين و الزيتون. و واحد تاني تلاقيه ساعة ما يسمع الأذان يطفي الأغاني وبعد ما الأذان يخلص يكمل سماع على أساس يعني أنه كده بيعظم شعائر الله لكن لماالأذان يخلص مفيش مشاكل . عندك مثلا حاجه مهمة جدا أن سواق التاكسي لازم يبدأ الصبح بقرآن وبعد كده ليس على الأعمى حرج . عندك مثلا معظم البنات دلوقتي في الجامعات وغيره لابسين ايشارب - مش عايز أقول حجاب لأن الحجاب له شروط المهم تلاقي البنت لابسه ايشارب سواء هي عارفه أنها مش لابسه الحجاب الشرعي أو لأ تلاقيها بتكلم ولاد عادي و بتقعد مع ولاد عادي . عندك برضه الناس فاكرة إن الإسلام هو أنك تصلي وتصوم و تزكي و تحج و يبقى أنت كده عملت اللي عليك - إن شاء الله هاكتب مقال ف القريب العاجل عن معنى الإسلام - و الإسلام عمره ما كان هو ده بس . في رمضان برضه تلاقي الناس منكبة على العبادة و بتصلي تراويح وقيام ليل و قرآن و فجر و ضحى و مش عارف ايه . وبعد رمضان يولوا على أعقابهم مدبرين . خد عندك كمان يا سيدي ( الطلبة) وقت الامتحانات - تبعنا دي - تلاقي اللي مكنش بيصلي بقى بيصلي و اللي كان مش عارف بيعمل ايه معدش بيعمل ايه و دعاء بقى وشغل عشرة على عشرة عشان طبعا ربنا ينجحه - طبعا حاجه جميلة أنه يعمل كده لأن ده معناه أنه عارف أن ربنا بإيده كل شيءو أن كل شيء يجري بقدره - لكن اللي مش حلو بقه أنه بعد ما يخلص امتحانات سواء بقى نجح أو سقط ينسى كل ده . د عندك يا سيدي حاجه حصلت قريب أهيه شيخ الأزهر اللي هو رمز الإسلام ف مصر يروح يسلم لك على قاتل إخواننا في فلسطين و اللي محاصر عزة "شمعون بيريز" . هي دي مش مظاهر ؟ . برضه عندك الريس بتاعنا بيصلي العيد ع الهواء مباشرة لكن بيظلم وينهب و يسرق و يعمل كل اللي نفسه فيه . هي دي مش مظاهر ؟ مشكلة بقى كبيرة ف الدعاة إلى الله لو كانوا يقولون مالا يفعلون ( كارثة) و في الحديث " كنت أنهاكم عن المنكر و آتيه و آمركم بالمعروف ولا آتيه" لكن ربنا يستر . يبدو أننا فعلا شعب مظاهر . قال رسول الله صلى الله عليه وسلم :(إن الله لا ينظر إلى صوركم ولا إلى أموالكم، ولكن ينظر إلى قلوبكم وأعمالكم) صحيح مسلم

سلم عليا

الكلام ده حصل في شهر نوفمبر الماضي دهوه خلال مؤتمر حوار الأديان مع إني عمر ما شفت أديان بتتحاور . المهم إذا كنا هذا ما فعله شيخ الأزهر فماذا تنتظر من باقي الشعب . و الله عيب . ده أنا لو فلسطيني و شفت المنظر ده تخيل أنت بقى مدى الألم النفسي . قبل ما أختم ممكن أطلب منكم طلب بجد . حد يسلم لي ع القضية الفلسطينية

أوباما . تشاينج وي كان بيليف

الانتخابات الأمريكية خلصت خلاص أخيرا . و فاز الشاب الوسيم أوباما رسميا خلاص بمقعد الرئاسة اللي هيبتدي يديره رسميا مع بداية العام القادم بعد ما "دبليو بوش" يخلع و يسيبهاله مخدرة . المهم أنا شخصيا أعتقد أن أوباما بالنسبة للمجتمع الامريكي هيفرق كتير بالذات للشباب . يعني أنا لو كنت شاب أمريكي كافر "أعوذ بالله يعني" كنت رشحت أوباما . لكن بالنسبة للعرب مش هيفرق خالص . السياسة الأمريكية بيديرها اللوبي الصهيوني الكبير أوي و محدش يحاول يفكر أن أوباما هينحاز لمصلحة فلسطين والمسلمين ضد اليهود. فمش فارقه خربانة خربانة . لكن بالنسبة للشباب الأمريكي فهو راجل روش . أفيدوني برأيكم

شوية ليهات

كل واحد فينا محتاج يرتب أولوياته . يعني مثلا لو الصلاة أذنت و أبوك قالك لك انزل اشتري لي علبة حلاوة تعمل ايه ساعتها ؟ لازم ترتب اولوياتك عشان متتعبش في الدنيا دي و تبقى بتعمل الصح
ليه لما الواحد بتفوت عليه محاضرة بيزعل و لما مبيصليش الفجر الموضوع بيعدي عادي جدا و يمكن يزعل شوية وخلاص ؟ ليه لما الواحد بيزعل أبوه أو أمه بيخرج م البيت و بيقول هما اللي غلطانين ولما واحد صاحبه يزعل منه بيبقى زعلان و بيفكر ازاي يصالحه ؟ ليه لما الموبايل يبوظ أو النت يفصل الواحد بيتنرفز و لما يشوف الناس في فلسطين بتموت مفيش أي مشاكل عادي خلاص اتعودنا ؟ ليه مبنحبش حد ينصحنا و ممكن نقبل النصيحة بس واحنا متنرفزين و مخنوقين ونقول في نفسنا ازاي فلان ده هو اللي ينصحني ده أنا وأنا ... ؟ ليه لما بنعمل حاجه غلط أو نغلط في حق واحد أو نخلف وعدنا أو نتأخر عن واحد مبنحبش نعتذر وبنعتبر ده إهانه لنفسنا ؟ ليه لما واحد يغلط فيك بتعصب و تتنرفز و لما الأمريكان يحتلوا أراضينا برضه عادي مفيش مشاكل ؟ ليه بنذاكر و احنا مخنوقين مع إننا لو نويت أني بأذاكر عشان أكون دكتور مسلم أو مهندس مسلم أو تاجر مسلم أنشر دني باخلاقي وأقول للناس غن المسلمين مش متخلفين و أن هو ده الإسلام الصحيح هاخد ثواب على نيتي ؟ ليه بنضيع وقتنا في حاجات مالهاش لازمة كتير و معظم وقتنا في الهلس ؟ ليه مبنقرأش و ثقافتنا على قدنا ومش فاهمين حاجه في الدنيا ؟ ليه لو صاحب شركة أمريكيو أو يهودية أو ... طلع ع التليفزيون وشتمك مش هتشتري المنتج بتاعه و لما أصحاب الشركات يمولوا اليهود عشان يقتلوا المسلمين بنشتري منهم ؟ ليه و ليه وليه .

رمضان السنة دي .. هغير حياتي

تصميم جديد عن رمضان

فيلم هندي

بسم الله الرحمن الرحيم . أنا هأتكلم عن الأفلام . movies . الأفلام دي ظاهرة غريبة جدا . ليه معظم الناس بتسمع أفلام . أنا مش هاتكلم عن الناس الصايعين الضايعين اللي بيسمعوا أفلام لأن الأفلام دي بالنسبة لهم من المعلوم من الدين بالضرورة و قد تكون أخف معصية بيعملها . أنا بأتكلم عن الناس اللي بتقول أنها ملتزمة و متدينة ! بيسمعوا أفلام ليه ؟ مع أنهم بيحافظوا على الصلاة في جماعة و ربما يكونوا مبيفوتوش فجر إلا نادرا . ليه بيسمعوا أفلام . ف الأول هنقول – و اللي عنده اعتراض يقول – أغلب الأفلام لازم يكون فيها مشاهد قليلة الأدب . ده الأغلب إن لم يكن الكل . طب لو افترضنا إن فيه فيلم مفيهوش مشاهد قلة حياء . أكيد هيكون فيه ستات . طيب . أعتقد أن أكتر حاجه العلماء أفتوا بجواز كشفها للمرأة هي الوجه والكفين فقط لا غير . و حتى لو فيه مرأة كاشفة وجهها وكفيها لا يجوز النظر إليها و محدش فينا يحب أن حد يبص على والدته أو أخته . و طبعا لو مرأه كاشفة غير كده يبقى لا يجوز النظر إليها . لو مرأة كاشفة رأسها لا يجوز النظر إليها . و أكيد أن أي فيلم لازم يكون فيه ستات و طبعا كاشفين حاجات كتير . أصل فيه ناس بتقول أنا بأتفرج على الممثل الفلاني أو الفيلم الفلاني لأنه فيلم نظيف أو ممثل محترم . غير كده اللي قال لك أنه بيدخل السينما وده عادي بالنسبه له . ده موضوع تاني خالص السينما ده . ده عايز له جلسة علاج مكثفة . الكلام ده مينفعش . أي ممثل لازم يكون معاه ممثلة و مفيش فيلم مفيهوش ستات و السينما حاليا مكان للمعاصي لأن أي فيلم حاليا فيه حاجات حرام . مش عارف آخرتها ايه ؟ أصل دي ظاهرة منتشرة جدا بين الشباب الملتزم أو من يدعي أنه كذلك . و غير كده واحد صاحبي كان بيسمع أفلام و بعدين ربنا تاب عليه و بطل وكان كل ما يشوف حد بيسمع افلام يقول ه لو سمحت اقفل . قابلته بعد فترة لقيته رجع يسمع أفلام تاني ! مش عارف آخرتها ايه ؟ أنا معاك أن الأفلام مشوقة جدا وولاد الذينه بيعملوا فيها جرافيكس جامد جدا و السيناريو بيبقى حلو جدا . لكن مش عارف آخرتها ايه برضه . أنا مش باتكلم على وجه إنكار المنكر فقط لأني أنا شخصيا ممكن أقع في الخطأ ده و كلنا بنغلط . أنا بأتكلم عن ظاهرة عند الشباب الملتزم و غيره . مش عارف آخرتها ايه . بس أحب أذكر أن احنا داخلين على رمضان .يعني ممكن بنية صادقة منك تخرج من رمضان بتوبة من موضوع الأفلام ده .بس عايزة عزيمة . أصل الأفلام عايزه زي السجاير . زي ما اللي بيشرب سجاير كل فترة بيحتاج سيجارة . برضه اللي بيسمع أفلام كل فترة بيبقى عايز يشوف الأفلام الجديدة . مش عارف آخرتها ايه ؟ بس اللي أنا متأكد منه أن الأقصى مش هيحرره ناس بتسمع أفلام . و خد بالك من حتة بيسمع أفلام مش بيشوف :D .سلام ختام

إذا حكم الجيش - آخر موضوع

* لا نتحدث لا سمح الله عن الجيش المصري كتشكيل عسكري و أسرار سلاح . ليس فقط لأنها منطقة محرمة بحكم القانون . بل لأن لدينا كعامة المصريين احترام عظيم للجيش الذي حرص لعقود على عدم التورط في صدام مع مواطنيه . و ظلت عقيدته القتالية ضد إسرائيل بالذات

* و قد يبدو غريبا أن نتحدث عن احتمال عودة الجيش لحكم مصر . فقد يرى البعض أن الجيش يحكم مصر بالفعل و أن الحياة المدنية معسكرة بما يكفي و أن عددا كبيرا من المحافظين و رؤساء مجالس المدن من أصول عسكرية و أن عددا غير قليل من رموز "جماعة البيزنس" يعودون في أصولهم للجيش أو جهاز المخابرات . و كل ذلك صحيح ولكنه لا يكفي للدلالة على وضع ممتاز للجيش في السياسة المصرية الآن . تماما كما أن وجود عدد كبير من القضاة في مناصب تنفيذية لا يعني أن القضاء المصري بخير

* هناك تصرفات تجري بالعمد لإنهاك أي طموح سياسي في الجيش . ففي سنوات حكم مبارك الطويلة ( 26 سنة إلى الآن و الله أعلم ) تضخمت ظاهرة الإحالة للتقاعد و من رتبة "عقيد" فما فوق . و استجدت ظواهر التوسع في منح المزايا والهدايا و كأن المراد هو "بزنسة الجيش" و جعله مفرخة لرجال الأعمال لا لجنرالات الطموح العسكري و السياسي . لكن هدف السياسة الحاكمة على أي حال يبدو ظاهرا فمبارك وعائلته لا يريدون منافسا و لا خليفة بالسياسة من الجيش . و لا السياسة الأمريكية تريد ذلك . و لا تفضله إسرائيل بالطبع . فثمة خشية ظاهرة من أي جنرال قد تغلب عليه روح التكوين الوطني المميزة للجيش المصري . ثمة خشية ظاهرة من يقظة الجيش للسياسة بعد 30 سنة من التهميش و الترويض المتصل . و قد كان ما جرى مع المشير محمد عبد الحليم أبو غزالة لافتا . كان أبو غزالة وزيرا للدفاع من سنة 1981 قبل اغتيال السادات و حتى 1989 و كان يمتاز بالديناميكية و الكاريزما الشخصية والطموح السياسي و العسكري معا و تولدت له شعبية هائلة في الجيش و ذاع صيته إلى الشارع مع قمع الجيش لتمرد الأمن المركزي أواسط الثمانينات . كان أبو غزالة يتصرف بندية ظاهرة مع مبارك . و في اللحظة التي غضبت فيها أمريكا على أبو غزالة تصرف مبارك بلا تردد بعد أن أخذ الضوء الأخضر الفاتح . فقد ادعت المخابرات الأمريكية أن أبو غزالة يرعى مشروعا لتطوير الصواريخ المصرية من خلال شبكة ممتدة إلى واشنطن . وانتهز مبارك طبعا الفرصة الكبيرة فأطاح بأبو غزالة و تكفلت وسائل إعلام مبارك بالباقي و نسب لأبو غزالة تهما بالتورط في فضيحة السيدة آرتين ( مأعرفش مين السيدة آرتين دي و ايه فضيحتها . يا ريت اللي عارف يقولي بجد ) . فهل كلن أبو غزالة هو الجنرال الأخير الذي حلم بحكم مصر ؟ و هل من فرصة لعودة الجيش إلى الحكم بعد نهاية مبارك

* يبدو المشير محمد سيد طنطاوي ( وزير الدفاع ) تلخيصا لحال الجيش و المآل الذي انتهى إليه . فالمشير طنطاوي يبدو كتوما كأنه لم يتكلم أبدا و نادرا ما يبتسم و بلا شعبية ملفتة وبلا طموح سياسي على الإطلاق و ربما كانت هذه الصفات وراء بقائه الطويل في منصب الوزير و القائد العام للقوات المسلحة و ربما حاسة الأمن المفرطة هي التي جعلت مبارك يثق بالمشير طنطاوي بالذات

* و الصورة في عمومها قد توحي بأن كل شيء هاديء على جبهة الجيش و هو ما شجع مبارك فيما يبدو على توريط متدرج للجيش . فقد تكررت حالات إحالة مبارك للمدنيين إلى محاكمات عسكرية . فقد حكمت محمكة مدنتة بإخلاء سيبل المهندس خيرت الشاطر و عشرات من رفاقه و على باب المحكمة صدر قرار باعتقالهم تطبيقا لقانون الطواريء الملعون و جرت إحالتهم إلى محكمة عسكرية و حكم عليهم بأحكام قاسية تتراوح بين 3 إلى 10 سنوات . و كان النائب طلعت السادات قد أحيل إلى محكمة عسكرية و صدر القرار بسجنه سنة كاملة . و هذا كله مما لا شك فيه أنه يسيء لسمعة الجيش و كما قلنا فكل ذلك مقصود

* هذه هي الصورة كما تبدو عن بعد و هي لا تشي باستحالة عودة الجيش لدور في الحكم و صنع السياسة . و قد يصح هنا أن نتذكر ما جرى في نهاية 2003 في قاعة البرلمان حيث كان الرئيس مبارك قد وقع مغشيا عليه و هو يلقي خطابه السنوي أما مجلسي الشعب والشورى . و فو ثوان كان الجيش يسيطر على الموقف داخل مبنى مجلس الشعب و يمنع رئيس الوزراء و الوزراء و النواب و قادة الحزب الوطني الحاكم و "دبة النملة" من الدخول إلى مبارك في استراحة الرعاية الطبية . و قد تبدو الصورة مشوشة و عليها غبار إذا حملنا ما جرى على استعداد الجيش للحكم في لحظة خطر رمزي . غير أن هذا الغبار قد ينجلي في لحظة خطر جدي كأن يموت مبارك أو يحدث انفجار اجتماعي تلقائي و الاحتمالين ليسا ببعيدين . و في كلتا الحالتين فقد يصبح زواج الجيش بالحكم من المعلوم بالضرورة . فهل يلجأ الجيش وقتها إلى الخبرة المتوارثة عر عقود مضت . و يلبس قناعا مدنيا في صورة حزب دولة و يتقدم جنرال للرئاسة بالبذلة و ربطة العنق و بغير سيوف ظاهرة على الكتف . و ننتهي إلى تمديد نظام مبارك بغير مبارك و عائلته . ثم كيف سيتصرف الجيش مع الإخوان و القوى المدنية المعارضة - و بكده نكون خلصنا الحته اللي كنت عايز ألخصها من كتاب "الأيام الأخيرة" لعبد الحليم قنديل
جزاكم الله خيرا جدا

إذا حكم الإخوان

الحلقة الثانية من تلخيص كتاب "الأيام الأخيرة" لعبد الحليم قنديل و هي مخصصة لجماعة الإخوان المسلمين و العقبات التي أمامهم إذا حكموا مصر وكيف سيتم ذلك
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
- هل يحكم الإخوان مصر ؟

* مبارك عازم تماما على حذف الإخوان من معادلة السياسة،والدولة الأمنية الآن لا شغل لها سوى عمليات اقتفاء أثر الإخوان ولا يبدو الإخوان على استعداد كاف للمواجهة،مرشد الإخوان مهدي عاكف صرح أخيرا بأنهم لن يخوضوا انتخابات المحليات المقررة في مايو 2008 و هي رسالة تهدئة مفهموة المعني

* بوسع الإخوان على أفضل تقدير الحصول على 40% من أصوات الناخبين و تبدو النسبة أقل في اتحادات الطلاب و هيئات التدريس والنقابات المهنية لو جرت انتخابات حرة،إن حضور الإخواني النقابي يبدو أكبر بكثير من حضورهم في الشارع، و بالنظر إلى الاعتصامات والإضرابات والاحتجاجات التي تحدث مؤخرا بدا الإخوان-رغم كونهم أكبر جماعة شعبية-غائبين بالجملة عن هذا المشهد الصاخب و لكن بوسع الإخوان الاستفادة بالطبع مما يجري ربما لأنهم أكبر كتلة بشرية نسبيا و أكثر تنظيما و أنهم مظلومين سياسيا كما أن الشعب مظلوم اجتماعيا و الإحساس بوطأة الظلم يردف بعضه بعضا

* إن وصول الإخوان للحكم معلق على أحد شرطين أو سيتبع أحد من السيناريوهين دول
1 . نوع من التهدئة و المساواة مع قصر الحكم الراهن : قد ينتهي الوضع الحالي إلى نوع من التواطؤ الضمني الصامت مع سيناريو التوريث و نقل الرئاسة بانتخابات صورية من مبارك الأب لمبارك الابن ،مرشد الإخوان مهدي عاكف اتهم ذات مرة حركة كفاية بأنها "تشتم مبارك"و هو ما قد يعني بمنطق المخالفة أن الإخوان مؤدبون ومهذبون و لا يفعلونها،والنائب الأول للمرشد د.محمد حبيب صرح مرة أنه لا مانع من ترشيح جمال مبارك للرئاسة بشرط الانتخابات الحرة و من الطبيعي أن مبارك يريد الوفاء بالجزء الأول من الجملة أما الانتخابات الحرة فهي شرط معلق في الهواء، والممارسة المرئية مغرية بتصديق تصور أن الإخوان قرروا ترك الرئاسة لمبارك وابنه من بعده، وربما بهدف خفض الحملات الأمنية فيما تبقى من أيام مبارك الأب و أن تتاح الفرصة لعودة هادئة للسياسة بعد استقرار الأمور لصالح نجله، و قد يسمح لهم بالوصول للحكم و لو بالمشاركة مع جماعة جمال مبارك .... رأيي الشخصي سيناريو غريب جدا معرفش جابه منين
2 . السيناريو الثاني يعتمد على قيادات الإخوان الوسطى من جيل السبعينات وما بعده و هؤلاء أكثر تحررا من عقدة أيام الطاغية عبد الناصر و أكثر (تسييسا) في مقابل غلبة (التديين) المسيطر على وجدان الجيل الأول و يبدو أن د.عصام العريان و د.عبد المنعم أبو الفتوح هم رائدي هذا الجيل (السبعينيات وما بعده) حيث أن د. عبد المنعم أبو الفتوح يعكس ميلا إلى التحول بالإخوان لحزب سياسي بغير التباسات الجماعة الدينية و هذا قد يعني فرصة لوصول الإخوان للحكم بمشاركة مع قوى أخرى -سيناريو غريب برضه من وجهة نظري-إذن وصول الإخوان للحكم معلق على أحد هذين الشرطين لكن السؤال الذي يبقى ... هل تسمح أمريكا بوصول الإخوان للحكم؟
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
- هل يعترف الإخوان بإسرائيل ؟

* كتب (مارك لينش) أستاذ العلوم السياسية المساعد بجامعة جورج واشنطن مقالا في (فورن بوليسي) كان بمثابة نصيحة لجماعة الإخوان،فقد نصح مارك لينش المرشد العام مهدي عاكف بأن تتسم الجماعة بالوضوح و تجنب الغموض و إعلان موقف الإخوان لجماهيرهم، هذا عن الشكل أما عن الموضوع فتبدو أولوية إسرائيل هي الغالبة ، فكلنا يعلم أن المصلحة الأمريكية الأهم تخص إسرائيل بالذات و ضرب لينش مثالا : مطلوب موقف للإخوان ضد هجمات حماس على إسرائيل .. فيما بعد أجرت أحد الدوريات حوارا مع مارك لينش عن نصيحته لمهدي عاكف و سألته ما إذا كان ممكنا تصور حوار مباشر بين الرئيس الأمريكي ومرشد الإخوان ؟ ضحك لينش قائلا :"ليس الآن وليس مع جورج بوش لكن الصمت لا يصح أن يظل سيد الانتظار"ا

* أصدرت مؤسسة كارينجي لدراسات السلام تقريرا بعنوان"التساؤلات التي ينبغي على الحركات الإسلامية الإجابة عنها"و العنوان الفرعي الشارح"جماعة الإخوان المسلمين المصرية كنموذج "و يمضي التقرير إلى التحذير و الإنذار الصارم بقوله "إن أي توجه إخواني نحو رفض الاتزامات الدولية لمصر بافتراض تشكيلهم أو تأثيرهم في حكومة منتخبة ديموقراطيا-و هو اليوم حلم بعيد المنال في مصر-سوف يساهم إلى حد كبير في نزع الشرعية عن الإخوان دوليا" اللغة صريحة وقاطعة لا اعتراف أمريكي بالإخوان مالم يعترفوا بإسرائيل، إن الموقف الرافض للاعتراف بشرعية كيان الاغتصاب الإسرائيلي هو حجر الزاوية في رمزية وتاريخ الإخوان ،فلا أحد ينكر تضحيات الإخوان بمصر وفلسطين بالذات في معارك الفداء بالسلاح ضد إسرائيل، و دم شهداء الإخوان لا يقبل المزايدة عليه ، قال مهدي عاكف :الإخوان لم و لن يعترفوا بإسرائيل و هو نفس ما أكده النائب الأول د.محمد حبيب

*رغم وجود انتقادات كثيرة لحزب الإخوان المسلمين الذي طرحت صيغته الأولى على الرأي العام في 25 أغسطس 2007 فقد انصرفت غالب الانتقادات إلى علاقة المدني بالديني ولكن ما يلفت النظر أن قيود كامب ديفيد(معاهدة السلا مع إسرائيل) لم تذكر بالمرة في القسم الخاص بالتحديات التي تواجه الأمن القومي المصري ولا كلمة واحده أيضا عن(اتفاق الكويز) و تصدير البترول والغاز الطبيعي لإسرائيل، لا يبدو إغفال القضية الكبرى مما قد يصح نسيانه باحتمال السهو و خصوصا مع تشديد برنامج الإخوان على مبدأ احترام المعاهدات الدولية و هو ما يثير التساؤل ملحا هل أن الصمت هو علامة رضا عن الاعتراف بإسرائيل القائم في مصر ، نحن نتحدث عن برنامج لجماعة الإخوان كلها وقد يوحي بانزلاق إلى خطيئة الاعتراف الصامت بإسرائيل و قد قيل إن تعديلات جرت على برنامج الإخوان وأن نسخة معدلة من البرنامج تشير إلى رغبة بإعادة النظر في كامب ديفيد و هو تطور إيجابي لافت و إن كان لا يبدو كافيا . الأيام الأخيرة ربنا يجعلها آخر الأحزان ... يا رب

تاج ع السريع

أول تاج .. من مدونة عاشقة الأقصى

1. ما نظرتك للبنات ذات الملابس المخالفة للإسلام ؟
في الغالب إنها مش محترمة و مضحوك عليها.

2. هل تحكم على بنت بمجرد النظر إلى لبسها ؟
أيون طبعا.

3.ما هو معنى الاحتشام عندك؟
الحجابي الإسلامي و عدم الخضوع في القول و الحياء.

4.هل لحشمة الملابس دور في احترام الفتاة أم أنها قناع زائف لدى بعض البنات ؟
اه طبعا الحشمة في اللبس بتفرض اسلوب معين في كل حاجة.

5.ما مدي تأثير أصدقاءك على طباعك و شخصيتك؟
تأثير كبير .. تأثير جميل.

6.أترى أن الغزو الفكرى أحد أسباب هذا الوضع؟
هو الأساس في هذا الوضع من أصله.

7.هل تدخل أسرتك في انتقاء ملابسك يضايقك ويقلل من شانك ويسلبك حريتك الشخصية ؟
لا طبعا , ده أنا نفسي ينقولي لبسي كله بس أشوفهم من أصله الأول.

ترقبوا القسم الثاني من تلخيص و إبداء الرأي حول كتاب "الأيام الاخيرة" لعبد الحليم قنديل

التوريث المستحيل

بعد قراءة كتاب "الأيام الأخيرة" لعبد الحليم قنديل قررت أن أكتب ملخصا عنه ولكن اتضح لي أن ذلك سيحتاج إلى كلام كثير فاعتقد أني في كل مرة سألخص جزءا من الكتاب . هذه المرة سأكتب عن أحد العناوين الداخلية للكتاب-لن يرثنا جمال مبارك
* مقدمة :
هل يحكم الجيش ؟ هل يحكم الإخوان ؟ هل يحكم جمال مبارك ؟ هل من طريق لمرحلة انتقال سلمي من حكم العائلة إلى حكم الشعب ؟ كلها أسئلة متعلقة برسم نهاية وشيكة لنظام انتهى إلى إلى الإفلاس التام ، فالنظام قد مات إكلينيكيا و عجز عن السيطرة على الدولة : فقر مندقع فثلثي الشعب المصري يعيش تحت خط الفقر العالمي المقدر بدولارين في اليوم والبطالة سيطرت على غالب الشباب مهما كانت مؤهلاتهم و العنوسة دخلت كل بيت فقد بلغ عدد الشبان والشابات الذين تخطوا سن الزواج-دون الزواج-إلى عشرة ملايين تقريبا بالأرقام الرسمية أضف إلى ذلك أن 45.9% من سكان القاهرة ذات الــ16 مليونا يقيمون في المقابر والعشوائيات ، عدد أطفال الشوارع بالرقم الرسمي يصل إلى مليون طفل ، أما الصحة فهي من سيء إلى أسوا يكفينا أن مصر تحتل المرتبة الأولى عالميا في عدد المصابين بمرض الالتهاب الكبدي الوبائي (فيروس سي) مصر بها 30% من المصابين بهذا المرض على مستوى العالم . هذه كانت بعض أحوال بلدنا ، إنه الرعب الذي ينتظرنا

* التوريث المستحيل : لن يرثنا جمال مبارك ، خطة التوريث محكمة جدا ، وتمضي بسلاسة السكين في الزبد ، لكنها على الأرجح لن تصادف هواها في النهاية،و لن يصبح جمال مبارك رئيسا رسميا لمصر ، خطة التوريث مرئية حتى للعميان،فحسني وابنه يتبعان طريقة التصادم المرحلي أي أن الصدمة لا تكون مرة واحده بل تدريجيا ، في البداية كان النفي قاطعا كالعادة عندما سُئل جمال مبارك في برنامج خاص للتلفزيون الحكومي فقد قال وقتها " ليس عندي رغبة في الترشح للرئاسة"و لكنه في مؤتمر الحزب الوطني الأخير كان رده ملفتا للنظر ، لم ينف مباشرة و بالجملة بل قال "لا أريد الدخول في قضايا فرعية فالإطار الدستوري واضح، إنها تكهنات الصحافة" تماما كما أن طريقة مبارك الأب في الإنكار تعرضت هي الأخرى للتخفيف ، قبل سنوات كان مبارك ينكر وبطريقة شبه قطعية ويقول "لا توريث في نظام جمهوري"و بعدها أدلى مبارك بحديث لقناة "العربية" و يصف دور ابنه السياسي على طريقة " ابني بيساعدني"! و كأن مقام الرئاسة تحول إلى محل كشري ،و قال مباكر في اجتماع مغلقق للهيئة البرلمانية للحزب الوطني و نقل عنه قوله " إذا الشعب عايز جمال يجيبه" و قد تلفت النظر إشارة مبارك إلى "الشعب" فهو على الأغلب بقصه نفسه شخصيا

تعديلات الدستور (تعديل المادة 76 من الدستور باستفتاء 25 مايو 2005)وجهت الضربة المزدوجة للسياسة الحية ولدور القضاء معا فقد وضعت شروط مانعة لترشح أي شخص من خارج حدود الأحزاب الرسمية ومن جماعة "الإخوان" المحظورة بالذات ، فهي تضع شرطا لترشح المستقلين يبدو أصعب في ضمان توفيره من توفير لبن العصفور ، تشترط توقيع 250 عضوا برلمانيا لصحة الترشح ، 65 عضوا من مجلس الشعب و 45 عضوا من مجلس الشورى و 140 عضوا بمجالس المحليات و قد كان يمكن لمرشح إخواني - أو يدعمه الإخوان - أن يتحصل على النصاب المطلوب من مجلس الشعب الحالي فلدى الإخوان الآن 88 نائبا و قد قامت التعديلات الدستورية (26 مارس 2007) بالواجب لقطع ذلك الطريق على الإخوان ، جرى إحلال الإشراف العملي لضباط الشرطة محل إشراف القضاة على الانتخابات و تحولت الانتخابات إلى تعيينات و تم الزج بجمال مبارك في لجنة السياسات في الحزب الوطني حتى يكون له الحق في الترشح للرئاسة فيما بعد بصفته في الحزب الوطني مع أنه ليس له ذلك بهذه السهولة إلا أنه ابن الريس و لكن في النهاية أحب ان أقول أن جمال مبارك إذا أمسك بالحكم ستنقلب البلد تماما فهو متهور جدا فقد اتخذ قرار تعويم الجنية (خفض قيمته للنصف) في لحظه بينما تردد والده لمدة 13 سنة في أخذ هذا القرار خوفا من الشعب ولس حبا فيهم ،فجمال إذا أمسك الحكم أعتقد أن أول قراراته ستكون إلغاء الدعم أو ترشيده ولا فرق بينهما بتاتا ، أنا شخصيا أعتقد أن موضوع التوريث ده حواليه كلام كبير قوي في قصر الرئاسة وكلام أكبر قوي في واشنطن وتل أبيب فهما الحاكمين الفعليين لمصر و إن أنكر من أنكر ، جمال يتطلع إلى الكرسي ولكن هل يقبل الشعب ، إذا قعد جمال على الكرسي فستكون خيبة أمل عارمة وجرعة يأس كبيرة لجميع الفئات فلا نريد أن ننتظر 27 عاما أخرى ..كفاااااااااااااااية بقى قرفتونا

الأيام الأخيرة

هل يحكم الجيش ؟ هل يحكم الإخوان؟ هل يحكم جمال مبارك ؟هل من طريق لمرحلة انتقال سلمي من حكم العائلة إلى حكم الشعب ؟كلها أسئلة معلقةبرسنم نهاية وشيكة لنظام انتهى إلى الإفلاس التام - كانت هذه مقدمة كتاب "الأيام الاخيرة" لعبد الحليم قنديل الكاتب الصحفي بجريدة الدستور الذي أقيم حفل توقيع هذا الكتاب في نقابة الصحفيين يوم الأحد 15/6 . بغض النظر عن اختلافي الفكري مع الكاتب عبد الحليم قنديل حيث أني أستمد تشريعاتي من الدين الإسلامي ولكنه في هذا الكتاب يتكلم عن الأيام الأخيرة لمبارك في حكم هذا البلد أو في هذه الدنيا ! . و لقد كان هناك جدل كبير حول منع إقامة حفل التوقيع ولكن الحفل تم في نقابة الصحفيين والتاتب سيثير الجدل حيث انه خطوة جريئة و واضحه بالاعتداء على الريس كما أن غلاف الكاتاب يحتوي على صورة تم رسمها بيد الفنان صالح عبد العظيم و هي صورة بشعة لوجه حسني مبارك تظهره في صورة رجل متعصب عجوز و يظهر ذلك من التجاعيد التي توجد في وجهة . وقال الكاتب عبد الحليم قنديل" هذا الكتاب ليس اعتداء على شخصية مبارك لأن بقاء مبارك في حكم هذا البلد هو عار على حد ذاته " و لقد حضر الحفل كل من الكاتب محمد عبد القدوس و الكاتب علاء الاسواني والأستاذ عبد الوهاب المسيري . و راجع لكم بعد يومين تلاته كده هاقرأ الكتاب ان شاء الله و أقول رأيي فيه ربنا يسهل

العقل الملتحي

بدون تشنج أو تعصب هنتكلم بالهداوة .. هنتفق م الأول أن الشخص اللي بيأخد بالحكم الفقهي أو الأمر الأصعب او الأحرص والأحوط اسمه متشدد مع أنه مش كده و اللي بيأخد بالأمر الأسهل والأيسر والأريح اسمه متساهل مع أنه مش كده .. مش عارف ليه دايما الشخص المتساهل بيبقى في موقف القوة ؟ حتى لو المتشدد و المتساهل الاتنين متدينين بيكون المتساهل في موقف القوة ليه بقى ؟ هأقولك ليه لأنه أولا أنت متقدرش تقول له أنت ليه أخدت الرأي الأسهل مع أنه من حقه بس برضه المتشدد دايما بيبقى نفسه المتساهل يبقى زيه لأنه شايف ان رأيه هو الصح حتى لو مقالوش كده بيبقى جوه نفسه فيه حاجه بتنقح عليه إنما المتساهل بيبقى مريح نفسه لأنه واخد بالأمر الأسهل - و عايز اقول هنا حاجه لازم اللي يأخد بالحكم الفقهي الأيسر في وجهة نظرة أنه يكون مقتنع بيه يعني بيستفتي قلبه و لو اطمن يبقى كده تمام عشان ميبقاش زي اللي بيتتبع الرخص و ده منهي عنه شرعا لأنه بعد شويه هتلاقي دينه بقى عامل زي الميه سايب ومفهوش أي انضباط ولا قوة - فالمتساهل ده بيبقى واخد بالأمر السهل و شايف أن اللي واخد بالأمر الصعب متشدد ومتعنت و لا يقبل الآخر و كل واحد طبعا بيبقى بيقيس الناس بالنسبة له .. يعني هو بيعمل نفسه زي المقياس و يقيس الناس عليه يعني ممكن تلاقي واحد- اسمه عبده مثلا- عبده ده ممكن تلاقيه متشدد بالنسبة لمحمد ومتساهل بالنسبة لمحمدين كده يعني لكن اللي عايز اوضحه أن المتساهل دايما في موقف قوة لأنه بيغمز للمتشدد وهو بيناقشه ويضخك ضحكات استهزائية ده إذا مقالوش فى وشه طب ليه يا أخي انت واخد بالحكم الاصعب مع انك ممكن تسهل على نفسك يعني مالآخر المتساهل اقوى م المتشدد لأنه بيستهزأ بيه وعشان كده واحد بيقول لي أنت متشدد و لأني مش طالع لي لحية فأطلق على لقب " العقل الملتحي" الله يرحمه بقى .. خواطري

دايما دموع

الضحك والبكاء و السياسة حاجه جامدة جدا ,, الضحك والبكاء نعمة من الله و هما من الحاجات اللي البشرية كلها اتفقت عليها على أنها بتدل على الفرح والحزن قال الله التعالى " وأنه هو أضحك وأبكي" و يقول "و أنه هو أمات و أحيا " كأن الضحك مرتبط بالحياة والبكاء مرتبط بالموت , بل إن بعض الحيوانات تعبر عن حزنها بالدموع ولكن التساميح تبكي عنددما تكون الفريسة بين أسنانها زي الرؤساء بتوع اليومين دول بيبكوا على الشعب اللي مش لاقي يأكل عيش و معلش عند العيش ده لازم أقف شوية _أنتوا فاهمين يعني ايه شعب مش لاقي يأكل عيش و فيهم ناس بتموت وهي بتدور على العيش حاجه غريبة جدا مع أن الدول التانية الناس زعلانه فيها لأنه مش لاقي العربية الفلانية والموبايل العلاني ومش عارف يعيش حياة الرفاهية مع أنه بالنسبة لنا عايش في الفردوس و احنا لسه بندور على العيش الله يخرب بيتك يا اللي في بالي و الله حاجه غريبة جدا الناس بتدور على العيييييييييييييييييييييييييش ازاي متسألنيش الله يخرب بيتك تاني يا اللي في بالي مش عارف أنا مستغرب جدا من حتة أن الناس بتدور على العيش _ نرجع لموضوعنا فالرئاسة بتطلع تعيط بكل الأسى والحزن والتقطيع في الذات على أن الناس ماتت في طوابير العيش و الناس غرقت في العبارات وماات في حوادث تصادم القطورات لكنها يا صديقي دموع التماسيح ، والبكاء بيتوظف توظيف سياسي جامد جدا زي اليهود ولاد الكابتن لما كانوا بيروحوا يبكوا عند حائط المبكى على مجدهم اللي راح لغاية لما احتلوا فلسطين لكن احنا النهارده وشباب المسلمين بيضحك ع الآخر و كأنهم منتصرين وامشي في الشارع وهتشوف واللي في المنصورة يروح شارع كلية آداب ويتفرج على الرجاله بتوعنا وبيضحكوا وكأنهم منتصرين عاملين زي الفريق اللي بيضيع وقت وهو خسران المهم أنا عايز أقول " الأمة التي تكثر البكاء ربما تشتاق يوما للنصر والضحك , و الأمه التي تكثر الضحك فهيهات أن تغار على محارمها يوما من الأيام" ,, خواطري

فرق كبير

الحجاج ده كان طاغية بس في عصر سابق و قتل الكثير من الصالحين ولكنه كان مسلم ولا يجرؤ أحد على تكفيره لكن اللي عايز أتكلم فيه هو الموقف التالي

" في يوم م الأيام الناس راحوا وكتبوا للحجاج على المنبر الآية القرآنية "قل تمتع بكفرك قليلا إنك من أصحاب النار" فلما جاء الحجاج وشاف الآية فقام كتب لهم "قل موتوا بغيظكم إن الله عليم بذات الصدور" هو ده الفرق بين الحجاج وبين الريس إن الريس محدش يعرف هو بيصلي في مسجد ايه ولا بيصلي في بيتهم علشان نكتب له حاجه م النوع ده "

و انتهت المحاكمات

انتهت المحاكمات العسكرية بظيلم كبير .. لم أكن أتوقع أن تنتهي المحاكمات هكذا .. لقد كنت أتوقع أن يتم التأجيل كالعادة المعتادة ولكنني فوجئت بالحكم فقد حكم على المهندس خيرت الشاطر و رجل الأعمال حسن مالك بسبع سنوات و تمت تبرءة 15 شخصا وتراوحت الأحكام من 3 إلى 10 سنوات .. لم أكن أتوقع أن يصدر الحكم هكذا .. و لكني فوجئت بالحكم .. ولكني فوجئت بالظلم
__________________________________________________________________

قام طلاب الإخوان المسلمين بجامعة المنصورة بعمل مسيرة سلمية تنديدا بالحكم الصادر في المحاكمات العسكرية

__________________________________________________________________

هذه قصيدة لزميلي و أخويا الشاعر الكبير "حمدي مناع" لسه مألفها بعد الفجر يوم الخميس 18 أبريل ..حاجه لسه طازة
القصيدة بتقول :

ضحكاتنا من همنا صارت بكاء
و دموعنا ليست بماء بل دماء
و حياتنا أضحت شقاء
و بلادنا تمشي بظهر للوراء
و يكرم القتال والسراق و الخوان
و يحكم الغوغاء
و يحاكم الأحرار والأبطال والإخوان
و يحاكم الشرفاء
علماؤنا
خلف الحديد بأرضنا سجناء
حكامنا لعدونا عملاء
هذي حكاية مصرنا
هذي نتيجة صمتنا
و الصمت داء
و الله قد جعل الدواء بفعلنا
برجالنا بنسائنا
بشيوخنا بشبابنا
نحن الدواء
و بنا ستخرج شمسنا
و بنا سيحيى شعبنا
و بنا تذوق بلادنا
طعم التحرر و الرخاء
و بنا سيولد صبحنا
من بين فخذي المساء
و تلوح الرايات عزا في السماء
و يكون غدنا لوحة
مرسومة أشكالها
ألوانها أوصافها
مما نشاء
و بنا سيكسر سيفهم
و رصاصهم
سيصير ماء ــــــــــــــــــــــــــــــــــــــــــ تمت

فيــ العالمــ العربيــ

في العالم العربي
الشاعر : تميم البرغوثي
ــــــــــــــــــــــــــــــــــــــــــــــــــــــــــــــــــــــــــــــ
في العالم العربي تعيش
كما قط ساكن تحت عربية
عينيه متشفش م الدنيا دي حاجه
إلا الجزم .
في العالم العربي تعيش
كما بهلوان السيرك
تحتك بهلوان دايس عليه
و فوق دماغك بهلوان دايس عليك
و الكل واقف محترم .
في العالم العربي تعيش
مباراة بقى لها ألف عام
لعيبة تجري يمين شمال
و الكورة طول الوقت في ايدين الحكم .
في العالم العربي
تقول للبنت حبيتك
وتبقى البنت بتحبك و بتموت فيك
تهفك بالقلم .
في العالم العربي تعيش
تشتم في طعم المية والطعمية
و في القهوة و روادها
و في مراتك و أولادها
و حر و زحمة الأتوبيس
و في اللي بيعمله إبليس و في التفليس
و لو سألوك .. تقول
الحمد لله ربنا يديمها نعم .
في العالم العربي تعيش
كما دمعة في عيون الكريم
المحنة تطردها
يرجعها الكرم .
في العالم العربي تعيش
تلميذ في حوش المدرسة
من غير فطار ، عينه على الشارع
و بيحيي العلم .
في العالم العربي تعيش
بتبص في الساعة
و خايف نشرة الاخبقار تفوت
علشان تشوف ع الشاشة ناس
في العلم العربي
تموت ـــــــــــــــــــــــــــــــــــــــــــــــــــــــــــــــــــــــ

شكر واجب

سأبدأ بالشكر لأنه ليس شكرا عاديا ولكنه شكر واجب

. شكرا لمباحث أمن الدولة لأنها حافظت على أمن الدولة

. شكرا للشعب المصري لأنه شعب إيجابي مبيخفش إلا من الحكومة

. شكرا للصحف الحكومية لأنها نشرت الحقيقة كاملة

. شكرا للسيد الرئيس لأنه لم يسمح و لا يسمح و لن يسمح بتجويع الشعب الفلسطيني ولكنه يسمح بقصفهم بالطائرات فقط

. شكرا للحزب الوطني لأنه وطني

. شكرا للمدرسين لأنهم يعلمون الطلاب الأخلاق الفاضلة قبل أن يعلموهم الفيزياء والكيمياء

. شكرا للمغنيين و المغنيات و الممثلين و الممثلات لأنهم نشروا الاخلاق الفاشلة قصدي الفاضلة بين الشباب

. شكرا للبائع لأنه لم يغش في البضاعة ولم يرفع السعر

. شكرا لمصلحة الضرائب لآن الضرائب مصلحتك أولا

. شكرا لشرطي المرور لأنه يعامل الجميع سواسية و يعامل الوزير كالفقير و لا يقبل الرشوة

. شكرا للباشا الكبير لأنه وهو خارج من شغله لا يعطل الشوارع عشان سيادة جناب حضرة سيادته يمشي براحته

. شكرا للمدخنين لأنهم بيحافظوا على شعور و صحة الناس ولا يدخنون في الأماكن العامة

. شكرا للمسؤول عن التعليم لأنه تعليم مجاني جدا جدا

. شكرا للموظف لأنه بيخلص للناس مصالحهم بسرعه ولا يقبل الرشوة برضه زي شرطي المرور بالضبط-كأنهم متفقين سبحان الله

. شكرا لأساتذة الجامعة لأنهم يحافظون على تحديث معلوماتهم دائما ليواكبوا التطور

. شكرا للرجل الذي لم يحتكر الحديد لأن الاحتكار من أخلاق التجارة الناجحة

. شكرا للمسؤول عن إغلاق شركات نجحت لكي يخدم مصالحه

. شكرا لكل من ساهم في تقدم هذا الوطن

. شكرا لك ..

شكرا جدا