اليوم السابع عشر : يا صاحبي قوم

يا صاحبي .. قوم

فتح عنيك
شوف الى ضاع .. شوف بين اديك
شيل السحابة .. شوف الغلابة
شوف الى أكله من الخرابة
و الى شكله يجيب كآبة
لا حلمه لحمة ولا جوز حمام
و لا عمره شاف شكل النعام
كل الى نفسه لقمة .. حاف
من غير غموس
أما العروس ..
فدي يا صاحبي كانت ف يوم م الأمنيات
وبقت يا صاحبي .. نكتة سقيلة
تزيد آهات
........
مبقتش أشوف ..
مبقتش أشوف يا صاحبي غير الغلابة .. الشقيانين
من كترهم .. مترميين ..
مترميين يا صاحبي ف كل حارة
مستنيين .. تحت العُمارة
حاجة لرب العالمين
مبقتش أشوف ..
مبقتش أشوف غير الغلابة المظلومين
مترميين .. تحت الجزم
زي الرمم .. دول متباعين
دول متباعين يا صاحبي و الله بدون تمن
.....
وأنت يا صاحبي ..
وانت يا صاحبي .. محتار
محتار يكون للصبغة لون الموت و لا لون العار
و الكرسي يتحسر على حاله و محتاله
يصرخ يقول .. دا انا كنت والله الرمز ..
رمز الشرف .. قالوا
والله دا أنت الرمز .. رمز القرف .. حالُه
.....
مبقتش أشوف يا صاحبي غير ..
غيرالغلابة المدبوحين
وأنا يا صاحبي .. فيهم .. زيهم .. منهم .
وأقولك في ودنك كلمتين .. يا صاحبي .. أنا ..
أنا أموت بالعز .. أموت أنا ..
ولا ف يوم أبوس جزم الجزم
يا صاحبي .. قوم

شِعر : كريم سنبل